Te Mare (#10417)

*Te mare ni Baha’i bon te bonnano ao te iraorao imarenaia itera aika uoua. E ngae n anne ma a riai ni bwaina te rangi ni karaurau ao n riki n ikikinai anuaia i bon irouia. E riai te itoman ae e aki tootoki aio ni kamwaneauaaki n te boraraoi ae e nene, ao e riai n ae te kaantaninga bon te karikirakea te bonnano, te iraorao, ao te katiteuanaaki ao n roota te maiu ae akea tokina. 
*Bon te kainrou n te Bahá’í are te reita ae akea i aona ao kaotan raoi nanoia naaka uoman.  Ao n aron anne, a riai ni kaota raoi nanoia ni koaua ma n atai nanoia ngaiia n tatabemaniia ao te berita are matoatoa are e karaoaki i marenaia e na riki bwa kabaeakiia n aki toki n iraorao ma n teimatoa n ti teuana n te maiu aei.
*‘Abdu'l-Bahá 

*Te Berita ni Mare, n te kibu are e na atongaki irouia  n tatabemaniia te tia mareaki te aine ao te tia mareaki te mwane i mataia taan  kakoaua uoman ke n raka ake a kariaiakaki iroun te Botaki n Tamnei bon aio, are e riai man te Boki are Moan te Tabu (Kitáb-i-Aqdas) are e kaangai:
*“TI NA BON MAMAEKA NI KOAUA N ARON NANON TE ATUA.”


Boni Ngaia te Aakoi, te Nanoanga!
E na neboaki Te Atua, are Ngkoangkoa are E aki maamate, are Akea Bibitakina, ao Akea tokina!  Boni Ngaia are E a tia ni kakoaua n oin Arona bwa bon Ngaia ae ti Temanna, ae akea Tauan Arona, te Moa n Rietaata.  Ti bon bane ni kakoaua bwa akea riki Te Atua bwa ti Ngaia ti ata Oioina n ti Ngaia, ni kaota Ngaia ae ti Temanna.  E mamaeka n te tabo ae akea rotakina, n taubukin Rietaatana, man te mwaaka ae tataekin bwaai nako ma bon ti Ngaia, man te inaomata ni kaotii bwaai nako ma bon ti Ngaia.  Ao ngke E iangoia n anga te raoiroi ao kakaraoan te raoiroi, ao ni baairea te aonaaba n etina, E rinanoi bwaai nako ao E karika Ana tua; mai buakon Ana tua E katea tuan te mare, bwa e na riki bwa te nono i bukin te mweraoi ao te kabwaia ao n riki bwa tabera are e na karaoaki nako naano man karawan te mwaaka are n Ana Boki are Moan te Tabu.  E taku te mwaaka are bon Mimitongina: Iein, au aomata, bwa mairoumi ane e na kaoti ngaia are e na Uringai mai  buakoia Au toro; bon aio teuana Au tua nakoimi; ongeaaba nako iai bwa te bwai n ibobuoki nakoimi.

-Bahá'u'lláh
-----------------------

Te Mare (#16110)

E na neboaki te Atua, are E a tia ni katamaroaa karawa n te tangira ma taian itoi ni katiteuanaaki ao n namoraoi, ao n tia ni kataua bwa inanon te aonnaba ni maiu te mare e n ariki bwa te tiibi ni bwainimwakuri ibukin ataakin te bwa are E a tia ni kataua ibukiia aomata ao utu n te aonnaba. Ni koaua, E a tia ni kaotirakei mwakoro n aono ao aono, ao n tia ni kaotii taian aati ao tiaienti, ao bwaai nikabane ake ko nori n te bong aei ke n tia n ongo mai irouia Ana toro aika a reiakinaki n taai ake a nako. E na karietaaki Uean Aara nako, Ngaia are E a tia ni kabaea te mare bwa te mwengaraoi nakoia Ana toro ao Ana aomata, ao bwa te kawai ibukin rauiia ao mweraoia inanon Ana tautaeka. Ai ngaia are e a tia ni kaotaki mai karawan Ana katabuaki inanon Ana Boki ae Moanbaan te Tabu, n ikotaki ma Ana Boki ao Ana Koroboki inanon taai ake rimoa ao n taai n tibwa nako. Ni koaua, E mwaaka ni kakoroa oin Nanona, ao Ngaia bon Teuare, Akea Kabotauana, te Aki Kona n Eenaki Arona…
O te Uea! I Bubutiko n aabebeten angin karangainan Am Taan Kaotioti, are rinanona Ko a tia ni kamaiuia karikibwai nikabane, ao man bwaronakon Am tituaraoi, ao ni bwaeaon marawan Am atatai ao wanawanam, ni buoka teuare e a tia n rairaki Nakoim ao rinanona are Ko a tia ni kaota Am tituaraoi ao Am tangira n akoi, ao are Ko a tia, bwa kanikinaean Am bwaintituaraoi ao kanikinaean Am tituaraoi, n akoia ma temanna Am tabonibaite aine are e a tia ni katabea ma te beku Ibukim inanon iraua te ririki. O te Uea, kabaeia n ikotaki inanon Aram, are rinanona Ko a tia ni kamaraui naano ao ni katikiia tamnei. Ni koaua, ko mwaaka ni karaoa are Ko tangiria, ao inanon Baim ae e ko taua mwin rooia nikabane ake i karawa ao iaon te aonnaba. Ko na kamoamoaaki, O Uean taian aonnaba ao Matennanoia nikabane ake a tia ni Kinako!

-Bahá'u'lláh
-----------------------

Te Mare (#10419)

Ko na neboaki Ngkoe Atuau!  Bon Am toro ni koaua aei ao Am toro naba te aine aei, ake a tia ni karikiia n ti te irikona i aan nuun Am nanoanga.  Te Uea!  Buokiira i nanon te aonaaba aei ao n Abanueam ni karekea nakoia baika a raoiroi man Am atataiaomata ao Am tangira.  Te Uea!  Kateimatoaiia i nanon aia beku i Bukim ao buokiia n Am kairiiri.  Karikiia bwa kanikinaaean Aram n Am aonaaba ao kaawakiniia i nanon Am kairiiri aika akea tiaia n te maiu aei ao n ae e na roko.  Te Uea!  A bubutii nakon Abanuean Am aakoi, ma ni kan buokaki nakon te tabo ae Kaonotiko.  E bon koaua bwa a mareaki bwa a na ira nanon Am tua.  Karikiia bwa a na riki bwa kanikinaaean te rau ma te iraorao ni karokoa tokin te tai.
Boni Ngkoe ae Moan te Mwaaka, Ko mena n taabo ni kabane ao Moan te Kakannato.
‘Abdu'l-Bahá

-`Abdu'l-Bahá
-----------------------

Te Mare (#10418)

Ngaia te Atua! O te Uea ae akea kabotauana!  N Am niniwana ae korakora Ko a tia ni kataua te mare irouia aomata, bwa e aonga n oneaki mwiin te rorona ni botannaomata ma te rorona riki n te aonaaba n rabwata aio, n akea tokina, ai bon maanin tokin te aonaba, bwa aonga ni kona ni katabetabeia n Atibun Am kateuanaaki n te toronaki ao te taromauri, te kinaa, te mataiakinaki ao te nebo.  “I aki kariki tamnei ao aomata, ma ibukin are a na Taromauriai.”  Ngaia are, maare ngkami ni karawan Ana nanoanga naaka mannikiba aika uoman ni ngaon Ana tangira, ao ni karaoia bwa kawain te katikitiki n akoi ae akea tokin ririkirakena; bwa man te ikotaki irouia taari n tangira aika uoman aikai naon te atataiaomata e na uti ao ni kaoti bwaeao aika itiakiruru man tamaroa a na uotaki nakon biken te maiu.  “E a tia ni kabwaranakoi taari aika uoua, bwa a na kaitiboaki:  Imarenaia bon te oo are aki kona n riaoia.  Kakabwaia raa ngkanne ae na aki angani ngkami ami Uea?  Mai Irouia n tatabemania E uotirakei bwaeao aika korakora riki ao aika karako riki.”
O Ngkoe te Uea ae akoi!  Karaoa te mare aio bwa e na kaotinakoi taian ane ma bwaeao.  Bon ngkoe ni koaua te Kabanea ni Mwaaka, te Kabanea ni Korakora, Akea Tokin Ana Kakabwarabure.

-`Abdu'l-Bahá
-----------------------

Te Mare (#16111)

Ngaia te Atua!
O te Uea ae akea kabotauana! Inanon Wanawanam ae moanbaan te korakora Ko a tia ni kataua te mare iaoia aomata, bwa a aonga aia roro nako aomata n ruruamwin are mai mwaaina inanon te aonnaba ae e kai toki aio, ao n aki toki, ni maanin teimatoan te aonnaba, a na katabeia n Atibun Mataroan Am katiteuana ma te beku ao te taromauri, ma te butimwaai, te kamoamoaaki ao te neboaki. "I aki karikii tamnei ao aomata, ma a na riai n Taromauriiai."  Ai ngaia are, mareia Ngkoe inanon karawan Am nanoanga mannikiba aika uoman aikai inanon ngaon Am tangira, ao karikiia bwa te anga ibukin katikan te tituaraoi ae e teimatoa; bwa man ikotakin taari n tangira aika uoua aikai naon te akoi e na uti ao n taauriinako aon biken te maiu taian bwaeao aika naati aika a itiaki ao n tamaroa. "E a tia ni kabwaranakoi taari aika uoua, bwa a na uaia ni kaitibo: Imarenaia bon te oo ae a aki kona n riaona. A ngaa ngkanne mai buakon Ana bwaintituaraoi te Uea ae ko na rawa nako iai? Mai irouia nako E kaotirakei taian bwaeao aika a korakora ao ni karako riki." 
O te Uea ae moan te akoi! Karika te mare aio bwa e na kaotirakei taian ane ao bwaeao. Ngkoe ni koaua te Kabanea ni Mwaaka, Moan te Korakora, te Nanoanga n Aki Toki.

-`Abdu'l-Bahá
-----------------------

Te Mare (#16112)

O au Uea, O au Uea! Taura aika a mronron aika a raneanea aikai a mareaki inanon Am tangira, ni kabaeaki inanon te beku nakon Atibun Am Mataroa ae e Tabu, ni katiteuanaaki nakon kabutanakoan Am Waaki. Karika te mare aio bwa taura aika a waaniniaki n Am tituaraoi ae e taonaki, O au Uea, te Kabanea n Nanoanga, ao buraenimatan Am angaanga aika a otanako, O Ngkoe te Akoi, te Aki Toki n Angaanga, bwa e aonga ni mwaanga man te kai ae moan te korakora aio tirina ake a na rikirake ni mawaawa ao ni maiureirei rinanon te bwaintangira ake a bwakanikarau man Am nang ni karaoiroi.  
Ni koaua Ko bon Tituaraoi, ni koaua Ngkoe te Kabanea ni Mwaaka, ni koaua Ngkoe te Nanoanga, te Kabwaraibuure nako.

-`Abdu'l-Bahá
-----------------------

Te Mare (#16113)

O te Atua, Atuau! Tomai inanon te bonnano tamnei aika uoman ao kamatoai waeia inanon te tangira ae akea tokina ao te ikotaki ae e aki tootoki, n te aro bwa ni katoaia a na riki nakon are temanna te tia angaanga Am tituaraoi, kanikinaean Am tangira n akoi, ao waanakon te tituaraoi man Am Abanuea. Anganiia kanoaia aika a itiaki ao n tamaroa ake a na tei ni matoa inanon te beku Nakoim, n tiku n teimatoa inanon Taromauriam, n ingainga ibukin Am Abanuea, ao ni kanoaaki ma te ungannano man Am Katanoata are Moan te Korakora. Ni koaua Ngkoe te Kabanea n Tituaraoi, ao ni koaua Ngkoe te Nanoanga, te Kabwaraibuure.

-`Abdu'l-Bahá
-----------------------

Te Mare (#16114)

E na neboaki te Atua are E a tia ni katamaroai oioin te aomata ma kaotakin kanikinaean te tangira ni karawa, ao n tia ni kaotai karikibwai aika a maiu ma otan te katikitiki, n te aro are a na kona n namoraoi, ni uaia n reitaki, ao ni uaia ni katikaki rinanon mwaakan karawa. Ni koaua, te ikotaki, te bobotaki, te mare, te uaia n itamwaomwao, te irekereke, ao te reitaki bon bukin reken te maiu nakoia karikibwai nako, ma te maenako, te raurenako, te aki itoman, te buuraure, te koroutu a kairiiri nakon te mate ao te urubwai nakoia karikibwai nikabane. Te Atua E a tia ni karika te aomata ma maiuna e katan iaon te ikoikotaki, te karikiriki, ao te uaia n itamwaomwao man taian erementi ake a kabanea ni beebete aroia, ake a moanibwai-ma bwaai nikabane ake E a tia ni katauii te Atua ibukin te mate, te urubwai, ao te maunanako a riki rinanon kawain te maenako, te raure, te kauamaenakoaki, ao te aki itoman ni bwaina nako ake a kakaawaki ake a boto nikabane. N te tai are te karikibwai ao taian erementi a ikotaki, a tomaaki, a ikatoatoaaki, ao a bane ni botaki, te karikibwai ae e maiu ke te kanoa ae e tomaaki e karikaki, e buaaki, ao n anganaki te kamaiuaki. Ao ni katoaa te tai are a bwaranako, a raurenako, a kauamaenakoaki, ngkanne te karikibwai anne e na maenikun, e na keerikaaki, ao e na bwaka man ana karinan are te kamaiuaki ibuakon te karikibwai.
Ai ngaia are, te Atua e a tia ni karaoa te namoraoi bwa bukin rikin te maiu, ao te kairiribai bwa bukin rikin te mate, ao E a tia ni kataua bwa te uaia ni katoatoa, te botaki, ao te uaia ni katikitiki imarenan nanoia tooro ao tabonibaiaine rinanon te kabaebae ae te mare e na riki bwa bukin te kukurei ao te tabomoa ibukin itera aika uoua are n te rabwata ao te tamnei. "E kamimitongaki Teuare Ngaia E a tia ni karikii taian ikatoatoa nikabane, man bwaai nikabane ake e kariki te aonnaba, ao bon mai irouia, ao man bwaai ake a riaon aia atatai."  Aio, ni koaua, bon kanikinaean Ana nanoanga ae e tatangira, ana bwaintituaraoi, ao tangira nakoia Ana toro aika a babanennano.
Ti bubutia te Atua bwa e na karika te mare aio bwa e na riki bwa bukin te kimwareirei, te waakirake, te karineaki, te mimitong, te kakukureiaki, ao te inaomata, bwa e aonga n are mai iroun te toro ao te tabonibai te aine aika a na kona ni kaoti tamnei aika a mwaiti ake a na taromauriia te Atua, ni bobaraaki ni kamoamoa i Matana, ni babanennano ao ni kokoaua raoi n aia onimaki, ao n teirake ni karaoa te beku Nakoina ao nakon te aonnaba ni botannaomata. Ngaia, ni koaua, te Akoi, te Kabanea n Nanoanga.
O te Atua, Atuau! Ko na kakabwaiaia bwatei aika uoman n te mare aio; aio Am toro ao Am tabonibai te aine, ni kauoman ake a kakoauaa Katiteuanaam, ni kakoauaa Am Katiteuanaaki, ao a katikaki nakon Am Abanuea. Katabua ibukiia nikabane bwaai aika a raraoi ao karika aia mare bwa e na riki bwa bukin te karietaaki, te karineaki, te kororaoi, te oota, ao te nanoanga n aki tootoki. Ni koaua, Ngkoe te Kabanea n Tituaraoi, te Nanoanga, ao Ngkoe are Ko tatangira ao n akoi nakoia Ana tabonibai aika aine ao am toro.

-`Abdu'l-Bahá
-----------------------

Te Mare (#16115)

O au Uea ao Au Kantaninga! Ko a tia, rinanon Wanawanam ae e karietaaki, ni kabaea te namoraoi iaoia Am karikibwai ao n anga te kaetieti ibukin te uaia n iraorao nakoia ake a maiuraoi ibuakoia am toro. Ko a tia ni karikii bwaai nikabane bwa a na ikatoatoa ao n tomaaki bwa a aonga rinanon te reitaki anne e na kona n noraki oin bukin Am waaki, ao rinanon te kabaebae anne, te kukurei ao te kimwareirei a na kaoti. Ko a tia, rinanon Am tituaraoi ao akoi, ni kabaei naano ao tamnei, bwa a aonga n raitiiti moaia, n aron taian taura, ma otan Am tangira, ao taian mare aika a kakukurei a na kona n riki ni katoaa te ingabong ao te tairiki…
Te Uea! Karikii tamnei aika uoman aikai n ai aron te rabwata ae ti teuana, teuana te tamnei, ao teuana te nano, ni uaia n reitaki imarenaia n ai aron te ran ao te uain, ao aron te anii ao te miriki are te kabanea n itiaki. Ko na katabua ibukiia aia kariki taian kakabwaia nikabane. Karakaa aia karinan ao karikiia bwa a na riki bwa kanikinaa aika uoua aika a otamwaaka ake a otanako man oraitanin te tangira ao te mwamwannano. Ni koaua, Ngkoe te Tia Katiteuana, te Kabanea n Rietaata ni Kanakoi Kaetieti, Boton te tangira nikabane, te Kabanea n Tituaraoi, te Nanoanga.

-`Abdu'l-Bahá
-----------------------

Te Mare (#16116)

Kariaia, O au Uea, bwa te mare aio e na rianako arona, e na kakukurei, e na kakabwaiaaki, ao ni kamoamoaaki. Kamatoaa Ngkoe, te ikotaki ao karakaa te namoraoi imarenaia tamnei aika uoman, bwa a aonga ni uaia ni maeka inanon te kabanea n rau ao ni kukurei, ao ni kona ni katea te utu ae e babanennano ae e Kakoauako ao n Am kanikinaa. Ni koaua, Ngkoe te Kabanea n Tituaraoi. Ni koaua, Ngkoe te Kabanea ni Mwaaka, te Tia Tautaeka iaon bwaai nako, te Kabanea ni Korakora.

-`Abdu'l-Bahá
-----------------------

Te Mare (#16117)

Ngaia te Kabanea ni Mimitong.
O ngkami mannikiba aika uoman aika kam ikakaan ao ni kaotaaki! Kam na neboa te Atua bwa inanon onarokan karawa, iaon kain te kantaninga, kam a tia n ukora te katantan inanoaan te ngao ae ti teuana ao ni uaia ni kabaei ngkami inanon kamoamoaakina ao katabuan te Uea ae akea kabotauana. Ai ngaia are, mwemwekaarake bwanaan te tamnei ao anenea te kuna aio ibukin kamimitongaakina ao neboana:
O te Uea! Ngaira mannikiba aika a ngore, ma ti maeka inanoaan katantanin Am kamanomano. Ngaira mannikiba aika a mangori ake a maeka iaon te bubuntano, ma ti ukoukora Mwengam ae e korakora. A mwaoto baira ni kiba, ma ti ingainga ni kan kibarake nakon Am taubuki aika a kabanea n rietaata ao Am tabo ni mimitongin karawa. Ai ngaia are, anganiira Am karaoiroi ao kariaia nakoira Korakoram, bwa ti aonga ni karekei baira ni kiba ni kukurei, ni kona ni kiba inanon te tibeiti ae akea tiana, ao n riki bwa kaain te Am Abanuea ni Mimitong. Ko na kariaia bwa, rinanon ikotakiia mannikiba aika uoman aika akea tiatianakiia aikai, nanain te tawaana ibukin te koaua a na kaoti ao ni kiba i eta inanoaan aban te katiteuanaaki ni karawa. E mena iaomi kamauri ao nebonebo.

-`Abdu'l-Bahá
-----------------------

Te Mare (#16118)

Ngaia te Kabanea ni Mimitong.
O Atuau, O Atuau! Aio Am toro are Ko a tia ni karikia bwa e na irekereke ma Am Kai ni karawa ao ni bungiaki iaan nuun Am katiteuana. Ko bon kamamma ni mamman Am tangira n akoi, ao ni kaikawaia inanoaan irabwatin Am kakaawakin. Ko bon kairia nakon te kawai ae e ineti ni karokoa, rinanon Am tituaraoi ao am akoi, e a roko n te roro n ikawai inanoaan katantanin Am kamanomano. Ko kairia bwa e na nakonako iaon te Kawai ae e ineti ao n aki bwaouanako, n taua ni kamatoa nakon Am Bwai ibukin Tautauana ae e matoa raoi ao Am Roobu ae e mwaaka, n te aro bwa e na kona ni kunea Kukurein Nanom, n rauaki ma Am kaetieti, n rairaki nakon Am karawa, n taakinaanako Neboam, ao ni kaoti anuaia ake a tangiraki ao ni kokoaua ibuakoia Am toro.
Ko a tia ni kaota te tangira nakoina ma temanna Am tabonibai te aine ao n tia ni mareia nakon neiei rinanon Am bwaintituaraoi aika akea tiaia. Te Uea, neiei bon te nati ae akea ana karo are e tobwaaki iaan nuun Am nanoanga ao ni kaikawaaki inanon bwanibwanin Am tangira ao am bwaintangira. E karekea rorona n ikawai inanon kamanomanon ana irabwati Am Boraraoi ao ni kawakinaki iaan matan n tararua Am tangira n akoi ao nanoanga.
O te Uea! Katiteuanai tamnei aika uoman aikai rinanon Am tituaraoi, ao kabaei nanoia n ikotaki rinanon Am bwaintituaraoi, bwa a aonga n riki bwa ti teuana te rabwata, teuana te tamnei, ao temanna te aomata, n aki kamemeaaki n te kaaitara ao te kairiribai, ao ni karikirakea riki te maiuraoi ao te itiaki ni katoaa te bong nako. N am tituaraoi buokiia n aia beku nakon Atibun Am Mataroa ae e korakora ao n tabu, ao kataua nakoia Am kakabwaia ao Am tangira. Kamanoia man taian karawawata ao kabuanibwai, man taian aoraki ao nanokaawaki. Bon Ngkoe, ni koaua, te Kabanea n Tituaraoi, te Kabanea ni Mwaaka, te Tia Angaanga. Ni koaua, Ngkoe Moan te Tituaraoi, te Kabanea n Nanoanga, are Am ibuobuoki e butiaki irouia nikabane.

-`Abdu'l-Bahá
-----------------------

Te Mare (#16119)

O au Uea ao au Kantaninga! Aio Am toro ae e a tia, n ongotaeka nakon Am kaetieti ao ni kakoroan nanon Am tua, e a mareaki ma Am tabonibai te aine n te aro bwa a na kona ni katea iaon Am aonnaba te utu are e na Uringko ibuakoia Am karikibwai, ni wewete inanon Aram ibuakoia Am aomata, ao n riki n rianako inanon nako te aonnaba ibukin tomana Nakoim ao ana onimaki Iroum. O te Uea! Kariaia bwa te mare aio e na tabomoa, kakabwaiaaki, taatangiraki, ao ni kukurei, ao karikia bwa bukin te namoraoi ao te itamwaomwao n aki toki. Ngkoe, ni koaua, ko buoka are Ko bon taku. Ngkoe, ni koaua, te Kabanea ni Korakora, te Kabanea ni Mwaaka, te Tia Tautaeka.

-`Abdu'l-Bahá
-----------------------

Te Mare (#16120)

O te Uea, karika te mare aio bwa e na kakabwaiaaki, tabomoa, ao ni kukurei. Kabaei tamnei aika uoua n ikotiia, ao Ko na kakukurei maata nikabane ma taian uaa ake a na otirake man te tai ae e rianako aio. Kamanoia ni kauoman inanoaan katantanin Am tararua ao Am kamanomano, ao tararuaia ma te mata ni matairiki n Am tangira n akoi. Karikiia bwa kanikinaean Uringam ibuakoia Am karikibwai, ao tauran Am atatai inanon kiraatin Am bwaintituaraoi ae e mwamwannano.
O te Uea! A mamaara; kakorakoraia rinanon Korakoram. A rinano; karietaia rinanon Mwaakam. A bubuti Nakoim ni mataroan Am katiteuana ao a onnon Nakoim ni mataroan Am nanoanga ae e tatangira. Ni koaua, Ngkoe te Kabanea ni Korakora, te Kabanea ni Mwaaka, te Tia Tituaraoi, te Nanoanga, te Mwamwannano.

-`Abdu'l-Bahá
-----------------------

Te Mare (#16121)

O te Uea! Kariaia bwa te mare aio bwa e na kakabwaiaaki ao ni kukurei. Karuoa Am nanoanga iaoia ni kauoman n te aro bwa mai irouia ao a na kona n otirake ataei aika a kakannangaki ake a na rairaki nakon Am Abanuea ae e tamaroa, ni Kamimitongko inanoia ao ma neweia iaon te aonnaba n aomata, ao ni kabwaranakoi taian miterio ake Ko a tia ni karinii inanon nanoia ao tamneia. Ngkoe ni Koaua, bon Teuare E katiteuanaia, kabaeia, ao n tomai n ikotiia te reeti n aomata. Ngkoe, ni koaua, te Tia Angaanga, te Nanoanga, te Akoi.

-`Abdu'l-Bahá
-----------------------

Te Mare (#16122)

O te Uea, karika te mare aio bwa e na riki bwa bukin reken te kakabwaia ni karawa ao te kawai ibukin te kauraaki n te ai n Am tangira inanon te Abanuea ae akea tokina. Kataua Am tituaraoi n te aro bwa a na kona ni kauoman n tangiraki n Atibun Am Mataroa ae e Tabu ao n tiku n teimatoa inanon Am tangira, ni kona ni waakirake n te itera n tamnei ni katoa nako te bong, ao ni kona n riki bwa kanikinaean te onimaki aika uoman aika a otanako ao ni kakaonimaki ibuakoia aomata.

-`Abdu'l-Bahá
-----------------------

